काठमाडौं। नेकपा एमालेका नेता भीम रावल अहिले पार्टी अध्यक्ष केपी शर्मा ओलीका उम्मेदवार हराउने अभियानमा लागेका छन्। पार्टी अध्यक्ष ओलीले रावललाई पाखा लगाउँदै उनको निर्वाचन क्षेत्र अछाम १ मा नेकपा माओवादीबाट एमाले प्रवेश गरेका झपटबहादुर बोहरालाई उम्मेदवार बनाएपछि रावल आक्रोशित बनेका हुन्।

अध्यक्ष ओलीले रावललाई टिकट नदिएपछि आक्रोशित भएका नेता-कार्यकर्ताहरुले पार्टी नै परित्याग गरेका छन्। तर, नेता रावलले भने पार्टी परित्याग गरेका छैनन्। उनी अध्यक्ष ओलीले उम्मेदवार बनाएका बोहरालाई हराउन सक्रिय भएका छन्।

उनी गृहजिल्ला अछाम पनि गएका छैनन्। यसअघि नेकपा एमालेले सुदूरपश्‍चिमका विभिन्‍न जिल्लामा आयोजना गरेको कार्यक्रममा पनि सहभागी भएनन्। उनी टीकापुर पुगेर कांग्रेस नेता-कार्यकर्ताहरुसँग भेटघाट गरेका छन्।

कैलाली क्षेत्र नम्बर १ मा पर्ने क्षेत्रमा पुगेका रावलले नातासमेत पर्ने नेपाली कांग्रेसका प्रदेश सभा उम्मेदवार रणबहादुर रावलको पक्षमा माहोल बनाउन सक्रिय भएको भन्दै नेकपा एमालेकै नेताहरुले आपत्ति जनाएका छन्।

कैलाली क्षेत्र १ लाई संवेदनशील क्षेत्रका रुपमा हेरिन्छ। विसं २०७२ मा भएको टीकापुर घटनापछि क्षेत्र नं १ ‘टीकापुर क्षेत्र’ लाई बढी संवेदनशील र चासोको साथ हेरिन थालिएको हो।

विसं २०७४ संघीय निर्वाचनमा यस क्षेत्रबाट राष्ट्रिय जनता पार्टीबाट टीकापुर घटनामा दोषी ठहर भई जेलजीवन बिताइरहेका रेशमलाल चौधरीले ठूलो मतान्तरले चुनाव जितेका थिए। त्यतिबेला नेकपा ‘माओवादी केन्द्र’ र नेकपा ‘एमाले’को गठबन्धन थियो भने नेपाली कांग्रेस एक्लै चुनाव लडेको थियो। प्रदेशसभा १ बाट जनता समाजवादीका कृष्ण चौधरी र प्रदेशसभा १ बाट नेपाली कांग्रेसका डा. रणबहादुर रावलले चुनाव जितेका थिए।

अहिले यो क्षेत्रमा रेशमलाल चौधरीकी पत्नी रञ्जिता चौधरी प्रतिनिधिसभा सदस्यको उम्मेदवार छन। अन्य राजनीतिक दलले गठबन्धन गरी निर्वाचनमा उत्रिँदा नागरिक उन्मुक्ति पार्टी भने एक्लै चुनावी मैदानमा छ।

यस क्षेत्रमा प्रतिनिधिसभा सदस्य निर्वाचनमा गठबन्धनबाट नेपाली कांग्रेसका केन्द्रीय सदस्य तथा पूर्वस्वास्थ्यमन्त्री रामजनम चौधरी मैदानमा छन्। त्यसैगरी प्रदेश सभा क मा रावललाई जिताउनका लागि भीम रावल खटिएका हुन्।