वि.स.२०४४ सालमा १५ वर्षको उमेरमा एकजना आफन्तका साथ लागेर आध्यात्म विषयको संस्कृत शिक्षा ग्रहणका लागि वाराणसी आइपुगेका बागलुङ काठेखोला गाउँपालिका–२ भीमपोखराका पौडेललाई एकदिन प्रसिद्ध काशी विश्वनाथ मन्दिरको पुजारी त्यसमा पनि मुख्य नै बन्छु भन्ने लागेको थिएन । लक्ष्य पनि त्यही थिएन, त्यही भएर उनले पुजारी बन्नु अगाडि भारतीय सेनामा धर्मगुरुको जागिर गरेका थिए, केही समय संस्कृतको अध्ययापन पनि गराए । तर, उनका पिताजी चुडामणि जो ज्योतिष थिए, कर्मकाण्डका जानकार र धार्मिक कथावाचकका रूपमा चिनिएका थिए । उनको इच्छा भने छोराले काशीमै त्यो पनि अध्यात्म क्षेत्रमै काम गरोस् भन्ने रहेछ । ‘मैले अध्यापन गर्दा गर्दै सेनामा जागिर खान पुगेको थिए । तर, त्यसका लागि पिताजीको आदेश भएन,’ पुजारी पौडेलले भने ‘उनको इच्छा अनुसार मैले बनारस नछोड्ने निर्णयमा पुगेको थिए ।’

प्रसिद्ध काशी विश्वनाथ मन्दिर त्यही बेला सरकारीकरण हुन पुग्नुले उनको भाग्य खुल्यो । उत्तर प्रदेश सरकारले सन् २००० मा ५ जना पूजारीका लागि विज्ञापन खुलाएको थियो । ४ सय ८० जना प्रतिस्पर्धी थिए । दोस्रो नम्बरमा उनको नाम निस्कियो । परीक्षा पास भएरै पूजारी भएको उनले सुनाए । दुई वर्षमै मुख्य पुजारीको विज्ञापन निस्क्यिो । उनले अर्को अन्तर्वार्ता दिए र सन् २००२ देखि नै काशी विश्वनाथ मन्दिरको मुख्य पुजारी भएर काम गर्दै आएका छन् । ९ वर्ष पछाडि उमेरले ६० पुगेपछि नियमानुसार उनले अवकास पाउने छन् ।