काठमाडौँ- आर्थिक सामर्थ्य र वैचारिक भिन्नताले समर्थन गरेको विशुद्ध अस्थिर संसारमा भू-राजनीतिक “टग-अफ-वार” को भूलभुलैयाले आर्थिक रूपमा कमजोर देशहरूको अस्तित्वलाई तरबारको धारमा ल्याइदिएको छ।

अमेरिका-चीन सम्भावित द्वन्द्वको बारे ग्राहम एलिसनको “थ्युसिडाइड्स ट्र्याप” मा बढ्दो शक्तिले जहिले पनि पेलोपोनेसियन युद्ध जस्तै युद्धलाई अपरिहार्य बनाउँदै यथास्थितिवादी शक्तिलाई चुनौती दिन्छ। अन्त्यमा साना शक्ति तथा कमजोर आर्थिक हैसियत भएका राष्ट्र समस्यामा पर्छन्। नेपाल एउटा उदाहरण हो। द्विध्रुवीयबाट बहुध्रुवीय संक्रमणको विश्वमा सुरक्षा र विकास व्यवस्थाका विभिन्न भिन्नताहरू जहाँ आफ्नै निहित स्वार्थका लागि नियम प्रायः स्थापित र तोडिन्छन्। अन्तर्राष्ट्रिय प्रणालीलाई अराजक बनाउँछ। शक्तिशाली देशहरुको विश्व व्यवस्थाको पक्षपाती व्याख्या र एकअर्काको विरुद्धमा जुट्नाले हामी जस्ता साना शक्ति राष्ट्रहरूलाई ठूलो जोखिममा पार्छ।

अहिले हाम्रा दुवै नजिकका छिमेकीहरूबाट उच्च प्रतिनिधिमण्डलहरू नेपाल भ्रमणमा आउनु सामान्य जस्तै भएको छ। धेरै विश्वव्यापी रिपोर्टहरूले सन् २०५० सम्ममा आर्थिक गुरुत्वाकर्षण हिमालयको वरिपरि हुने बताउँछ। शक्ति केन्द्रहरूले यस हिमाली भूभागमा भविष्यमा आफूलाई सफलतापूर्वक स्थापित गर्न विशिष्ट ढंगले तयारी गरिरहेका छन्।

सभामुख अग्निप्रसाद सापकोटाको निमन्त्रणामा सेप्टेम्बर १२ देखि १५, २०२२ मा तीन दिने नेपाल भ्रमणमा आएका चीनका नेशनल पिपुल्स कांग्रेसका अध्यक्ष ली चान्सुको पछिल्लो भ्रमणले आसन्न प्रादेशिक र संघीय निर्वाचनअघि वाम एकता वा गठबन्धन निर्माणमा कुनै किसिमको चिनियाँ संलग्नता देखाउँछ कि भनेर आंकलन पनि गरिएको छ। साथै थाती रहेका चिनियाँ विकास परियोजना जस्तै बीआरआईमा पनि केही प्रगति हुने आशा देखिन्छ।