भारतले चीन सीमानजिक शक्तिशाली रेडार राख्ने, चिनियाँ हतियारमा नजर भारतीय सेनाले चीन सीमामा शक्तिशाली रेडार राख्न लागेको सञ्चारमाध्यमहरूले खबर दिएका छन् ।

यस रेडारले पहाडपछाडि, उपत्यकाका कुनाकाप्चा र जंगलमा लुकाइएका हतियारको लोकेसन पत्ता लगाउने बताइएको छ । भारतीय सेनाले पहिला पनि त्यस्तो रेडार राखेको थियो तर अहिले त्यसको अप्ग्रेडेड माउन्टेन भर्जन राख्न लागेको हो ।

यसका लागि भारतीय सेनाले भारत इलेक्ट्रोनिक्स लिमिटेडलाई स्वाती वेपन लोकेटिङ रेडार बनाउन भनेको छ ।

यसको उपयोग अग्लो भूभागमा गरिनेछ । यसले शत्रुको आर्टिलरी, रकेट र मोर्टारहरूलाई ट्य्राक गर्नेछ ।
पुरानो भर्जनको स्वातीको ४६ वटा युनिट भारतभरि तैनाथ गरिएको छ ।

यस रेडारले ३० किलोमिटर परबाट आएको आर्टिलरीलाई चिन्छ र त्यसको गति तथा दिशा पनि बताइदिन्छ । त्यस्तै चारदेखि ८० किलोमिटर टाढाबाट आएको रकेट वा सानो क्षेप्यास्त्रलाई पनि यसले ट्रेस गर्छ ।